اسلام آباد: سعودی عرب کے ایک اعلیٰ سطح کے کاروباری وفد نے وزیراعظم شہباز شریف سے ملاقات کی، جس میں دونوں ممالک کے درمیان اقتصادی تعاون اور سرمایہ کاری کے فروغ پر تفصیلی گفتگو کی گئی۔
سعودی پاکستان مشترکہ بزنس کونسل کے چیئرمین منصور بن محمد آل سعود کی قیادت میں وفد نے وزیراعظم سے ملاقات کی۔
وزیراعظم شہباز شریف نے سعودی عرب کے فرمانروا خادم الحرمین الشریفین اور ولی عہد کے لیے نیک خواہشات کا اظہار کیا۔ انہوں نے کہا کہ پاکستان سعودی عرب کے ساتھ اپنے دیرینہ تعلقات کو اسٹریٹجک اقتصادی شراکت داری میں تبدیل کرنے کے لیے پُرعزم ہے۔
وزیراعظم نے کہا کہ دونوں ممالک کے درمیان مشترکہ تعاون کو آگے بڑھانے کے لیے موجودہ وقت بہترین اور موزوں ترین ہے۔ انہوں نے امید ظاہر کی کہ سعودی وفد کا دورہ مختلف شعبوں میں مفاہمتی یادداشتوں اور معاہدوں پر دستخط کی راہ ہموار کرے گا۔
سعودی کاروباری وفد نے پاکستان کے زراعت، بندرگاہوں کی نجکاری و انتظام، ہوائی اڈوں اور توانائی کے شعبوں میں سرمایہ کاری میں دلچسپی کا اظہار کیا۔
منصور بن محمد آل سعود نے وزیراعظم کی جانب سے پرتپاک استقبال پر شکریہ ادا کیا۔
سعودی وفد اپنے دورے کے دوران اعلیٰ حکومتی نمائندوں اور متعلقہ شعبوں کے دیگر فریقین سے بھی ملاقاتیں کرے گا۔
