اسلام آباد: پاور ڈویژن نے بجلی کی تقسیم کار کمپنیوں اور پاور انفارمیشن ٹیکنالوجی کمپنی کو قومی بجلی ریگولیٹری اتھارٹی کی نیٹ میٹرنگ سے متعلق ہدایات پر عمل درآمد کرنے کی ہدایت کردی ہے۔
سرکاری بیان کے مطابق ایسے صارفین کے کیسز کی تصدیق کی جائے گی جنہوں نے 9 فروری 2026 سے قبل ڈیمانڈ نوٹسز کی ادائیگی کردی تھی۔ یہ عمل زیرِ التوا تمام نیٹ میٹرنگ درخواستوں کے جامع جائزے کا حصہ ہوگا۔
پاور ڈویژن نے کہا ہے کہ جن صارفین نے تمام مطلوبہ قانونی اور انتظامی مراحل مکمل کرلیے ہیں، انہیں غیر ضروری رکاوٹوں یا تاخیر کا سامنا نہیں کرنا پڑے گا۔
جن درخواست گزاروں نے 9 فروری سے پہلے تمام مراحل مکمل کرلیے تھے، ان کے اہل نیٹ میٹرنگ کنکشنز تصدیق کے بعد بلا تاخیر نظام میں شامل کیے جائیں گے۔
پاور انفارمیشن ٹیکنالوجی کمپنی کو بھی اہل نیٹ میٹرنگ کنکشنز کو نظام میں شامل کرنے کی ہدایت کی گئی ہے۔
سرکاری بیان میں کہا گیا ہے کہ تصدیق کا عمل قومی بجلی ریگولیٹری اتھارٹی کی ہدایات پر درست اور منصفانہ انداز میں عمل درآمد یقینی بنانے کے لیے کیا جارہا ہے۔
پاور ڈویژن نے مزید کہا کہ وہ تمام بجلی تقسیم کار کمپنیوں میں متعلقہ ہدایات پر عمل درآمد کی مسلسل نگرانی جاری رکھے گا۔
