پاکستانی اداکارہ ہانیہ عامر نے بھارتی پنجابی فلم سردار جی 3 سے بین الاقوامی سطح پر شاندار ڈیبیو کیا ہے، جہاں وہ مشہور گلوکار اور اداکار دلجیت دوسانجھ کے مقابل نظر آئیں۔ یہ فلم پاکستان میں کسی بھی بھارتی پنجابی فلم کی سب سے بڑی اوپننگ کا ریکارڈ قائم کر چکی ہے۔
بھارت اور پاکستان کے درمیان کشیدگی کے باعث کئی سرحد پار پراجیکٹس منسوخ کر دیے گئے تھے، اور خدشہ ظاہر کیا جا رہا تھا کہ ہانیہ عامر کو فلم سے نکال دیا جائے گا۔ تاہم، دلجیت دوسانجھ نے دباؤ اور دھمکیوں کے باوجود ہانیہ کو فلم سے نہیں نکالا اور سردار جی 3 کو بھارت کے علاوہ عالمی سطح پر ریلیز کیا گیا۔
فلم نے پاکستان میں ریلیز کے پہلے ہی دن 3 کروڑ روپے سے زائد کا بزنس کیا، جو کسی بھی بھارتی پنجابی فلم کے لیے اب تک کی سب سے بڑی اوپننگ ہے۔ اس کامیابی نے نہ صرف ہانیہ عامر کو نمایاں کیا بلکہ پاک-بھارت فنکارانہ تعاون کی گنجائش اور عوامی دلچسپی کو بھی اجاگر کیا۔
ہانیہ عامر نے اس تاریخی کامیابی پر خوشی کا اظہار کرتے ہوئے انسٹاگرام پر اپنے مداحوں کا شکریہ ادا کیا اور لکھا: "آئی لو یو پاکستان!”
یہ فلم ہانیہ عامر کے کیریئر کا اہم موڑ ثابت ہوئی ہے، جس سے نہ صرف ان کا بین الاقوامی سفر شروع ہوا بلکہ انہوں نے پاکستانی باکس آفس پر بھی اپنی مقبولیت کا لوہا منوا لیا ہے۔
