جولائی 2، 2025
بھارت میں انتہا پسند حکومت نے ممبئی میں لاؤڈ اسپیکر پر اذان دینے پر مکمل پابندی عائد کر دی ہے، جب کہ شہر بھر کے مذہبی مقامات سے لاؤڈ اسپیکر ہٹا دیے گئے ہیں۔
ممبئی پولیس کمشنر دیون بھارتی نے بھارتی میڈیا کو بتایا کہ پولیس کی کارروائی کے نتیجے میں شہر کے مختلف مذہبی مقامات سے لگ بھگ 1500 لاؤڈ اسپیکر ہٹا دیے گئے ہیں۔
انہوں نے کہا کہ اب ممبئی کو "لاؤڈ اسپیکر فری سٹی” قرار دے دیا گیا ہے اور پولیس یہ یقینی بنائے گی کہ آئندہ کوئی مذہبی مقام دوبارہ لاؤڈ اسپیکر نہ لگائے۔
بھارتی حکومت کی جانب سے لاؤڈ اسپیکر پر اذان دینے کی پابندی کو مسلم برادری کے خلاف ایک اور متعصبانہ قدم قرار دیا جا رہا ہے۔ انسانی حقوق کی تنظیمیں اور مذہبی رہنما اس پابندی کو مذہبی آزادیوں میں مداخلت اور اقلیتوں کے خلاف امتیازی رویہ قرار دے رہے ہیں۔
بھارت میں اس سے قبل بھی کئی شہروں میں لاؤڈ اسپیکر پر اذان یا دیگر مذہبی سرگرمیوں پر پابندیاں عائد کی جا چکی ہیں، جس پر مسلم برادری اور سیکولر حلقوں کی جانب سے سخت ردعمل سامنے آتا رہا ہے۔
