بالی ووڈ کے مشہور اداکار عامر خان نے حال ہی میں ایک دلچسپ انکشاف کیا کہ کس طرح کرکٹ کی تاریخ کے ایک یادگار لمحے نے ان کی شادی کا دن اداسی میں بدل دیا۔
ایک انٹرویو کے دوران عامر خان نے بتایا کہ انہوں نے 21 برس کی عمر میں رینا دتہ سے خفیہ شادی کی تھی، کیونکہ دونوں کے خاندان اس رشتے کے خلاف تھے۔ شادی کے فوراً بعد جب وہ گھر لوٹے، تو گھر والوں کو ان کی غیر موجودگی کا احساس تک نہ ہوا، کیونکہ سب کی نظریں بھارت اور پاکستان کے درمیان شارجہ میں ہونے والے اہم میچ پر جمی ہوئی تھیں۔
عامر کے مطابق اُس وقت بھارت میچ جیتنے کے قریب تھا، اور وہ خوش تھے کہ ان کی شادی اور بھارت کی جیت ایک ہی دن ہو گی، لیکن قسمت کو کچھ اور منظور تھا۔ آخری گیند پر پاکستان کو چار رنز درکار تھے جب جاوید میانداد نے بھارتی بولر چیتن شرما کو چھکا مارا اور پاکستان کو جیت دلائی۔
عامر نے کہا، "میری خوشی غم میں بدل گئی۔ میں چاہتا تھا کہ میری شادی کا دن بھارت کی فتح کے طور پر یاد رکھا جائے، لیکن وہ دن بھارت کی شکست کی پہچان بن گیا۔”
کئی برس بعد جب عامر خان کی جاوید میانداد سے ملاقات ہوئی تو انہوں نے ہنستے ہوئے شکایت کی، "جاوید بھائی، آپ نے میرے ساتھ زیادتی کی! آپ کے چھکے نے میری شادی کا مزا کرکرا کر دیا۔” جس پر میانداد حیران رہ گئے اور پھر مسکرا دیے۔
یہ تاریخی میچ آج بھی شائقینِ کرکٹ کو یاد ہے۔ 10 اپریل 1986 کو کھیلا گیا یہ مقابلہ جاوید میانداد کے اُس آخری بال پر چھکے کی بدولت کرکٹ کی دنیا میں امر ہو گیا — اور جیسا کہ عامر خان نے بتایا، کچھ لوگوں کی ذاتی زندگیوں پر بھی اس کا گہرا اثر رہا۔
