پاکستان تحریک انصاف (پی ٹی آئی) سندھ کے صدر حلیم عادل شیخ نے کہا ہے کہ ملک میں مہنگائی انتہا پر پہنچ چکی ہے اور آبادی کا نصف سے زائد حصہ غربت کی لکیر سے نیچے زندگی گزارنے پر مجبور ہے۔
انہوں نے کراچی میں عادل ہاؤس پر پارٹی رہنماؤں سے ملاقات کے بعد میڈیا سے گفتگو کرتے ہوئے کہا کہ پٹرولیم مصنوعات کی قیمتوں میں مسلسل اضافہ حکومتی عوام دشمن پالیسیوں کا ثبوت ہے۔
"دنیا بھر میں تیل کی قیمتیں کم ہو رہی ہیں، مگر پاکستان میں الٹا اضافہ کیا جا رہا ہے، جو عوام کے ساتھ کھلی زیادتی ہے۔”
انہوں نے کہا کہ ملک میں آئین و قانون کی بالادستی باقی نہیں رہی، عدلیہ آزاد نہیں، میڈیا پر پابندیاں ہیں، اور انصاف ناپید ہے، ایسے میں ملک صحیح راستے پر نہیں چل سکتا۔
حلیم عادل شیخ کا کہنا تھا کہ عمران خان اور پی ٹی آئی سے دشمنی کی بنیاد پر عوام کو نشانہ بنایا جا رہا ہے، پہلے ووٹ پر ڈاکا ڈالا گیا، چوروں کو حکومت دی گئی، اور پھر ان کو بچانے کے لیے آئینی اقدار پامال کی گئیں۔
انہوں نے انکشاف کیا کہ 26ویں آئینی ترمیم کے بعد اب 27ویں ترمیم لانے کی کوشش ہو رہی ہے، جسے قوم کسی صورت قبول نہیں کرے گی۔
پی ٹی آئی رہنما نے اعلان کیا کہ عاشورہ کے بعد عمران خان کی رہائی کے لیے ملک گیر تحریک شروع کی جائے گی۔
"عمران خان کے بغیر ملک نہیں چل سکتا۔ انہیں جیل میں رکھ کر جو ظلم کیا جا رہا ہے، اسے قوم کبھی برداشت نہیں کرے گی۔”
انہوں نے کہا کہ قوم آئین کی بالادستی، آزاد عدلیہ، آزاد میڈیا اور حقیقی آزادی کے لیے سڑکوں پر نکلے گی۔
