وفاقی وزیر دفاع خواجہ آصف نے اشارہ دیا ہے کہ پاکستان پیپلز پارٹی (پی پی پی) جلد وفاقی اور پنجاب حکومت میں شامل ہو سکتی ہے۔
ایک نجی ٹی وی چینل سے گفتگو کرتے ہوئے خواجہ آصف نے کہا کہ فی الحال تمام معاملات کھل کر نہیں بتائے جا سکتے، لیکن امکان موجود ہے کہ پیپلز پارٹی حکومت کا حصہ بن جائے۔
"پیپلز پارٹی کی شمولیت ایک مثبت قدم ہوگا”، انہوں نے کہا، تاہم انہوں نے واضح کیا کہ وہ دونوں جماعتوں کے درمیان جاری رابطوں کی تفصیلات سے واقف نہیں ہیں۔
خواجہ آصف نے مزید کہا کہ ن لیگ اور پیپلز پارٹی ایک قومی ایجنڈے پر مل کر کام کر سکتی ہیں تاکہ سیاسی استحکام اور قومی مسائل کا حل ممکن بنایا جا سکے۔
یاد رہے کہ اس سے قبل سندھ کے سینئر وزیر شرجیل میمن نے ایسی خبروں کی تردید کی تھی اور کہا تھا کہ پیپلز پارٹی کو تاحال کوئی پیشکش موصول نہیں ہوئی۔
