پاکستان کی معروف اداکارہ اور اینکر پرسن فضا علی نے حالیہ بارشوں کے دوران لاہور میں نکاسی آب اور صفائی کے بہترین انتظامات پر وزیراعلیٰ پنجاب مریم نواز شریف اور ان کی ٹیم کی کارکردگی کی کھل کر تعریف کی ہے۔
اپنے ویڈیو بیان میں فضا علی نے بتایا کہ وہ گوشت لینے کیلئے لاہور کینٹ سے گزریں جہاں پہلے بارش کے بعد پانی جمع ہو جاتا تھا اور سفر کرنا انتہائی مشکل ہو جاتا تھا، لیکن اس بار ایسا کچھ نہیں ہوا۔
"بارش کے باوجود پورے کینٹ میں کہیں پانی نہیں کھڑا تھا، سڑکیں صاف تھیں، اور عملہ صفائی میں مصروف تھا۔ میں نے خود دیکھا کہ کوئی جھاڑو لگا رہا تھا، کوئی پانی صاف کر رہا تھا، کچرا اٹھانے والی گاڑیاں بھی متحرک تھیں،” فضا علی نے کہا۔
انہوں نے کہا کہ اس بہتری کا کریڈٹ مریم نواز کو جاتا ہے، اور ایسی مثبت تبدیلیوں کو سراہنا چاہئے تاکہ دوسرے شہروں میں بھی ایسے اقدامات کیے جا سکیں۔
یہ بیان ایسے وقت میں آیا ہے جب ملک کے بڑے شہروں میں بارش کے بعد نکاسی آب کے ناقص انتظامات پر عوامی شکایات سامنے آتی رہی ہیں۔
