پنجاب حکومت نے صحت کے شعبے میں مختلف ترقیاتی منصوبوں کے لیے 26 ارب 77 کروڑ روپے کے فنڈز کی منظوری دے دی۔
صوبائی ترقیاتی ورکنگ پارٹی کے 7 ویں اجلاس میں صحت کے شعبے میں مختلف ترقیاتی منصوبوں کے لیے فنڈز کی منظوری دی گئی جبکہ اجلاس میں سیکرٹری پی اینڈ ڈی رفاقت علی، چیف اکانومسٹ مسعود انور، ممبران پی اینڈ ڈی بورڈ اور متعلقہ سیکٹرز کے افسران شریک ہوئے۔
اجلاس میں منظور کردہ فنڈز میں جناح انسٹیٹیوٹ آف کارڈیالوجی کے میڈیکل آلات کی خریداری کے لیے 7 ارب 70 کروڑ روپے شامل ہیں۔
اس کے علاوہ، نواز شریف انسٹیٹیوٹ آف کارڈیالوجی سرگودھا کے میڈیکل آلات کی خریداری کے لیے 3 ارب 83 کروڑ روپے کے فنڈز مختص کیے گئے۔
محکمہ اسپیشلائزڈ ہیلتھ کے اسپتالوں کی مرمت اور بہتری کے لیے 6 ارب 84 کروڑ روپے کی منظوری دی گئی جبکہ ڈی ایچ کیو ہسپتال حافظ آباد کی تعمیر اور مرمت کے لیے 8 ارب 39 کروڑ روپے کے فنڈز منظور کیے گئے۔
