کراچی: جیکسن کے علاقے سے 9 جولائی 2025 کو شادی کے جھانسے (ہنی ٹریپ) میں آکر اغواء ہونے والے 45 سالہ محمد شعیب ولد الٰہی بخش کو بازیاب کرا لیا گیا۔
پولیس کے مطابق اغواء کاروں نے مغوی کی رہائی کے عوض 50 لاکھ روپے تاوان طلب کیا تھا۔ واقعے کا مقدمہ تھانہ جیکسن میں درج کیا گیا، جس کی تفتیش بعد ازاں اے وی سی سی (AVCC) کراچی کے سپرد کی گئی۔
اے وی سی سی (AVCC) اور گھوٹکی پولیس نے مشترکہ کارروائی کرتے ہوئے مغوی کو ضلع گھوٹکی کے کچے کے علاقے سے بازیاب کرایا۔ کارروائی ایس ایس پی اے وی سی سی اور ایس ایس پی گھوٹکی کی نگرانی میں تکنیکی اور انسانی انٹیلیجنس کی بنیاد پر عمل میں لائی گئی۔
اغواء میں ملوث ملزمان فرار ہونے میں کامیاب ہو گئے ہیں جن کی تلاش جاری ہے۔ مغوی محمد شعیب اور مدعی نے کامیاب بازیابی پر پولیس ٹیم کا شکریہ ادا کیا ہے۔
