لاہور کی عدالت نے زمان پارک میں اسلام آباد پولیس اہلکاروں پر مبینہ حملے کے کیس میں تحریک انصاف کے بانی چیئرمین عمران خان کو جیل سے طلب کرنے کا حکم دیا ہے جبکہ سینیٹ میں اپوزیشن لیڈر شبلی فراز کے ناقابل ضمانت وارنٹ گرفتاری جاری کر دیے ہیں۔
یہ مقدمہ 2023 میں لاہور کے ریس کورس تھانے میں درج کیا گیا تھا، جب پولیس اور پی ٹی آئی کارکنان کے درمیان عمران خان کی رہائش گاہ زمان پارک کے باہر جھڑپیں ہوئیں تھیں۔
عمران خان، جو اگست 2023 سے اڈیالہ جیل میں قید ہیں، کو عدالت کے حکم پر جیل حکام کے ذریعے پیش کیا جائے گا۔ عدالت نے کیس کی مزید سماعت 30 جولائی تک ملتوی کر دی ہے۔
یہ پیشرفت ان عدالتی فیصلوں کے بعد سامنے آئی ہے جن میں 9 مئی کے ہنگاموں میں ملوث کئی اہم رہنماؤں کو 10،10 سال قید کی سزائیں سنائی گئی ہیں، جن میں ڈاکٹر یاسمین راشد، میاں محمود الرشید اور عمر سرفراز چیمہ شامل ہیں۔ جبکہ شاہ محمود قریشی سمیت چند رہنماؤں کو مقدمات سے بری کر دیا گیا ہے۔
