ایک نئی تحقیق میں ماہرین نے کہا ہے کہ فرنچ فرائز زیادہ کھانے سے ٹائپ 2 ذیابیطس کا خطرہ بڑھ سکتا ہے۔ اُبلے، بیک یا میش آلو صحت کے لیے کم نقصان دہ ہیں۔
طبی ویب سائٹ پر شائع ہونے والی اس تحقیق میں بتایا گیا ہے کہ آلو کا نقصان اس بات پر ہے کہ انہیں کس طرح پکایا جاتا ہے۔ فرنچ فرائز زیادہ تیل میں تلے جاتے ہیں، جو انہیں نقصان دہ بنا دیتا ہے۔
30 سال سے زائد عرصے تک 2 لاکھ سے زیادہ افراد کی خوراک اور صحت کا جائزہ لیا گیا۔ نتائج سے پتا چلا کہ ہفتے میں تین بار فرنچ فرائز کھانے سے ذیابیطس کا خطرہ 20 فیصد بڑھ جاتا ہے۔ جبکہ اُبلے، بیک یا میش آلو کھانے سے ایسا نہیں ہوتا۔
ماہرین نے کہا کہ اگر فرنچ فرائز کی جگہ مکمل اناج یا صحت مند غذا کھائی جائے تو ذیابیطس سے بچا جا سکتا ہے۔ روزمرہ کی خوراک میں چھوٹی تبدیلیاں، جیسے کم فرائز کھانا اور زیادہ مکمل اناج استعمال کرنا، بیماری سے بچاؤ میں مددگار ہے۔
انہوں نے مزید کہا کہ تمام آلو یا کاربوہائیڈریٹس ایک جیسے نہیں ہوتے، اس لیے خوراک کا منصوبہ بناتے وقت اس فرق کو سمجھنا ضروری ہے۔
