وزیراعظم شہباز شریف نے وفاق میں صحت سہولت کارڈ کو مستقل کرنے کے لیے ایک اعلیٰ سطحی کمیٹی تشکیل دیتے ہوئے ایک ہفتے میں رپورٹ طلب کر لی۔
ذرائع کے مطابق کمیٹی میں وفاقی وزراء احسن اقبال، مصطفیٰ کمال، سیکریٹری خزانہ، سیکریٹری منصوبہ بندی، سربراہ صحت کارڈ پروگرام محمد ارشد اور سی ای او اسٹیٹ لائف انشورنس شامل ہیں۔ ذرائع کا کہنا ہے کہ وزیراعظم نے کمیٹی سے ایک ہفتے میں صحت کارڈ کے حوالے سے رپورٹ مانگی ہے۔
کمیٹی فیصلہ کرے گی کہ صحت کارڈ کے اخراجات جاری بجٹ سے پورے کیے جائیں یا ترقیاتی بجٹ سے فنڈز مختص کیے جائیں۔ وفاق میں صحت کارڈ کی یونیورسل کوریج سے لاکھوں خاندان مستفید ہوں گے۔
اسلام آباد، آزاد کشمیر، گلگت بلتستان اور ضلع تھرپارکر کے شہری بھی وفاق کے صحت کارڈ پروگرام کا حصہ ہیں۔ یاد رہے کہ وفاقی دارالحکومت کے شہری کئی ماہ سے صحت کارڈ کی سہولت سے محروم ہیں۔
