بھارت کے مشہور ٹی وی کوئز پروگرام کون بنے گا کروڑ پتی (کے بی سی) کے تازہ ٹریلر نے آن لائن تنازع کھڑا کردیا ہے، جس میں بھارتی فوج، بحریہ اور فضائیہ کی خواتین افسران کو آزادی کے موقع پر پیش کیا گیا ہے۔
بولی وڈ لیجنڈ امیتابھ بچن کی میزبانی میں جاری اس پروموشنل کلپ میں کرنل صوفیہ قریشی (بری فوج)، ونگ کمانڈر ویومیکا سنگھ (فضائیہ) اور کمانڈر پریرنا دیوستھلی (بحریہ) شامل ہیں۔ ٹیزر میں یہ افسران "آپریشن سندور” کے بارے میں گفتگو کرتی دکھائی دیتی ہیں، جو رواں سال پاکستان کے ساتھ کشیدگی کے دوران مبینہ طور پر کیا گیا تھا۔ ناقدین نے اس دعوے کو من گھڑت قرار دیا ہے۔
ٹریلر کے اجرا کے فوراً بعد بھارت میں شدید ردِعمل سامنے آیا۔ سوشل میڈیا صارفین نے وزیراعظم نریندر مودی کی حکومت پر الزام لگایا کہ وہ حب الوطنی کو ایک تماشے میں بدل رہی ہے اور اس طرح کے مناظر قومی خدمت اور تنازعات کی سنجیدگی کو کم کرتے ہیں۔
دوسری جانب پاکستان میں انٹرنیٹ صارفین نے موقع غنیمت جانتے ہوئے ٹریلر کو نشانہ بنایا۔ اے آئی ٹولز کی مدد سے ٹیزر کو اس انداز میں دوبارہ ایڈٹ کیا گیا کہ کرنل صوفیہ مبینہ طور پر پاکستان سے شکست کا اعتراف کرتی نظر آئیں — یہ مزاحیہ ویڈیو اصل کلپ سے زیادہ وائرل ہوگئی۔
یہ تنازع ایک بار پھر ظاہر کرتا ہے کہ بھارت اور پاکستان کے درمیان کشیدگیاں اکثر تفریحی دنیا تک بھی پہنچ جاتی ہیں اور ہلکے پھلکے پروگرامز بھی آن لائن بحث کا باعث بن جاتے ہیں۔
