پاکستانی ڈرامہ انڈسٹری کی معروف اداکارہ زرنش خان نے ملک میں بڑھتی ہوئی ایل جی بی ٹی کیو سرگرمیوں پر گہری تشویش کا اظہار کیا ہے۔
اداکارہ کا کہنا ہے کہ اس طرح کے رجحانات پاکستان کی تہذیبی، اخلاقی اور مذہبی اقدار کے منافی ہیں۔ ان کے مطابق پاکستان کی بنیاد اسلامی تعلیمات پر رکھی گئی ہے اور ان تعلیمات سے ہٹ کر نظریات کو عام کرنا آنے والی نسلوں کی تربیت پر منفی اثر ڈال سکتا ہے۔
زرنش خان نے مزید کہا کہ میڈیا اور بااثر شخصیات پر بڑی ذمہ داری عائد ہوتی ہے کہ وہ ایسے نظریات کو فروغ نہ دیں جو معاشرتی روایات اور اقدار سے متصادم ہوں۔
ان کے اس بیان پر سوشل میڈیا پر مختلف آراء سامنے آئیں۔ کئی صارفین نے زرنش خان کے مؤقف کی حمایت کی اور کہا کہ مغربی نظریات کو پاکستانی معاشرے پر مسلط نہیں کیا جانا چاہیے، جبکہ کچھ لوگوں نے ان پر تنقید بھی کی اور مؤقف اختیار کیا کہ ہر فرد کو اپنی زندگی اپنے اصولوں کے مطابق گزارنے کا حق حاصل ہے۔
