سیلابی صورتحال کے پیش نظر پنجاب ہیلتھ کیئر کمیشن نے نجی ہسپتالوں کیلئے ہیلتھ ایمرجنسی الرٹ جاری کر دیا۔
الرٹ کے مطابق علاج و معالجے اور طبی سہولتوں کے تسلسل کو برقرار رکھنے کیلئے فوری اقدامات کریں، کل بستروں کی گنجائش کا 35 فیصد سیلاب متاثرین کیلئے مختص کریں اور مفت علاج فراہم کریں۔
پنجاب ہیلتھ کیئر کمیشن کے مراسلے میں کہا گیا ہے کہ ایمرجنسی وارڈز، آئی سی یوز اور ایچ ڈی یوز کو مکمل فعال رکھیں، ضروری ادویات، ویکسینز، خون، میڈیکل ڈیوائسز اور بجلی کے متبادل انتظامات یقینی بنائیں۔
مراسلے میں ہسپتالوں کو ہنگامی صورتحال میں محفوظ انخلا کے منصوبے بھی تیار رکھنے کی ہدایت دی گئی ہے، سیلاب سے متاثرہ مریضوں کی منتقلی کیلئے ریسکیو 1122 اور دیگر اداروں سے قریبی رابطہ رکھنے کی بھی ہدایت کی گئی ہے۔
پنجاب ہیلتھ کیئر کمیشن نے مراسلے میں تنبیہ کی ہے کہ ہدایات پر عمل درآمد نہ کرنے والے ہسپتالوں کے خلاف تادیبی کارروائی کی جائے گی۔
