لاہور – پنجاب میں گزشتہ 24 گھنٹوں کے دوران سیلابی واقعات میں کم از کم 20 افراد جاں بحق ہوگئے ہیں۔ یہ اعداد و شمار صوبائی ڈیزاسٹر مینجمنٹ اتھارٹی (پی ڈی ایم اے) نے جمعہ کو جاری کیے۔
ڈی جی پی ڈی ایم اے عرفان علی کاٹھیا کے مطابق سب سے زیادہ ہلاکتیں گوجرانوالہ سے رپورٹ ہوئی ہیں۔ انہوں نے وضاحت کی کہ انخلا کے دوران کسی شہری کی ہلاکت نہیں ہوئی۔
ان کا کہنا تھا کہ جاں بحق ہونے والوں کے لواحقین کو فی کس 10 لاکھ روپے مالی امداد دی جائے گی۔ وزیراعلیٰ پنجاب مریم نواز کی ہدایت پر مویشیوں کو محفوظ بنانے کے لیے بھی اقدامات کیے جا رہے ہیں۔
پی ڈی ایم اے کے مطابق اب تک 3 لاکھ 17 ہزار سے زائد جانور محفوظ مقامات پر منتقل کیے جا چکے ہیں جبکہ چارے اور خوراک کا بندوبست بھی کیا جا رہا ہے۔ متاثرہ علاقوں میں ہیلی کاپٹر اور کشتیاں استعمال کر کے شہریوں کو محفوظ مقامات تک پہنچایا جا رہا ہے۔
