مالاکنڈ: خیبرپختونخوا کے مالاکنڈ ڈویژن کے علاقے کنڈاکو ڈھیری میں مسلح افراد نے گھر میں گھس کر سوئے ہوئے پانچ افراد کو فائرنگ کر کے قتل کر دیا اور فرار ہو گئے۔
لیویز پوسٹ خار کی رپورٹ کے مطابق نازیہ بی بی زوجہ عبدالوکیل دختر شاہ زمین نے پولیس کو بیان دیا کہ ملزمان منصور ولد ظریف اللہ، شریف اللہ اور ظریف اللہ پسران زیب اللہ ساکنان میخ بند رات گئے ان کے گھر میں داخل ہوئے اور اندھا دھند فائرنگ کر دی، جس کے نتیجے میں ان کے والد شاہ زمین، دادا سعید گل، والدہ عامر زاد گئی، دادی مہر زمینہ اور بہن نازش موقع پر ہی جاں بحق ہو گئے۔
ایف آئی آر کے مطابق واردات کی وجہ ملزمان کی بہن نازش اور شوہر کے درمیان علیحدگی کا تنازع تھا۔
اطلاع ملتے ہی اسسٹنٹ کمشنر ریاض محسود، صوبیدار میجر سمیع اللہ باچا اور پوسٹ کمانڈر فضل اکبر بھاری نفری کے ہمراہ جائے وقوع پر پہنچے، شواہد اکٹھے کیے اور ملزمان کی گرفتاری کے لیے ہدایات جاری کیں۔
علاقہ مکینوں نے ایک ہی گھر سے پانچ جنازے اٹھنے پر شدید رنج و غم کا اظہار کرتے ہوئے ملزمان کی فوری گرفتاری کا مطالبہ کیا۔
