10 ستمبر 2025
ویب ڈیسک
کراچی: شہرِ قائد میں موسلا دھار بارشوں نے نظام زندگی مفلوج کر دیا۔ گڈاپ ٹاؤن میں واقع تھڈو ڈیم اوور فلو ہونے کے بعد نکلنے والا طاقتور سیلابی ریلا سعدی ٹاؤن اور اطراف کی بستیوں میں داخل ہو گیا، جس سے گھروں میں چار سے پانچ فٹ تک پانی جمع ہوگیا۔
ایم 9 موٹروے اور سپر ہائی وے بھی زیرِ آب آ گئے۔ الحبیب ریسٹورنٹ کے قریب پانی داخل ہونے پر کراچی اور حیدرآباد کے درمیان دونوں اطراف کی ٹریفک کئی گھنٹے معطل رہی۔ نیشنل ہائی ویز اینڈ موٹروے پولیس کے مطابق پانی کی سطح موٹروے کے کنارے سے ٹکرا گئی تھی اور بڑے حصے کو ڈبو دیا تھا، تاہم کلیئرنس کے بعد اب ٹریفک بحال ہونا شروع ہوگئی ہے۔
ترجمان وزیراعلیٰ ہاؤس نے بتایا کہ موٹروے کے درمیانی کرش بیرئیر کو ہٹا کر پانی کے بہاؤ کا راستہ دیا جا رہا ہے تاکہ گاڑیوں کی آمدورفت بحال رکھی جا سکے۔ وزیراعلیٰ سندھ کی ہدایت پر کمشنر کراچی نے ریسکیو اداروں کو متحرک کر دیا ہے جبکہ فوج کو بھی طلب کر لیا گیا ہے۔
شہر کے مختلف علاقوں میں نکاسیٔ آب کے نظام کی ناکامی سے کئی رہائشی علاقے ندی نالوں میں تبدیل ہوگئے۔ سعدی ٹاؤن، گڈاپ اور سپر ہائی وے کے اطراف مکین اپنے گھروں اور سامان کو بچانے کی جدوجہد کر رہے ہیں۔
دوسری جانب، حکومتِ سندھ نے حفاظتی اقدامات کے تحت آج شہر بھر کے تمام تعلیمی ادارے بند رکھنے کا اعلان کیا ہے۔
