ممبئی – کامیاب ترین کورٹ روم کامیڈی ڈرامہ جولی ایل ایل بی کے تیسرے سیکوئل کا ٹریلر ریلیز کردیا گیا، جس نے مداحوں میں زبردست جوش و خروش پیدا کردیا ہے۔ اکشے کمار اور ارشد وارثی ایک بار پھر عدالت میں مد مقابل دکھائی دیں گے۔ فلم 19 ستمبر کو سینما گھروں کی زینت بنے گی۔
ٹریلر لانچ کی تقریبات کانپور اور میرٹھ میں شاندار انداز سے منعقد ہوئیں اور ریلیز ہوتے ہی یہ سوشل میڈیا پر وائرل ہوگیا۔ فلم کے تیسرے حصے میں سینئر اداکار سوروابھ شکلا بھی ایک بار پھر حاضر جواب اور دلچسپ جج کے کردار میں نظر آئیں گے۔
ٹریلر میں اکشے کمار ایک ہائی پروفائل وکیل کے روپ میں سامنے آتے ہیں جن کا انداز پُراعتماد اور جارحانہ ہے، جبکہ ارشد وارثی حسبِ روایت ایک چھوٹے وکیل کے طور پر مزاحیہ اور دلکش انداز میں عدالت کے مکالمے کرتے نظر آتے ہیں۔ دونوں کے درمیان جاندار جھڑپیں قہقہوں اور سنجیدگی کا امتزاج پیش کرتی ہیں۔
اس بار فلم کی کہانی فارم ہاؤس اور زرعی زمین کے تنازعات پر مبنی ہے، جس میں سماجی طنز، قانونی ڈرامہ اور مزاح کو یکجا کرکے پیش کیا گیا ہے تاکہ ناظرین کو ہنساتے ہنساتے سوچنے پر بھی مجبور کیا جا سکے۔
اپنی اصل کاسٹ اور سماجی حوالے سے اہم موضوع کے ساتھ جولی ایل ایل بی 3 ریلیز سے قبل ہی شائقین کی توقعات کو عروج پر لے گئی ہے۔
