بھینس کالونی، جو ماضی میں اپنی پُرامن فضا اور کاروباری سرگرمیوں کے لیے جانی جاتی تھی، ان دنوں ایک جرائم پیشہ گروہ کی وجہ سے شدید خطرے کی زد میں ہے۔ "تالہ توڑ گروپ” نامی یہ گینگ رات کی تاریکی میں دکانوں کے تالے کاٹ کر قیمتی سامان لوٹنے میں مصروف ہے، جس سے علاقے میں خوف و ہراس پھیل چکا ہے۔
گزشتہ رات اس گروہ نے کمرشل ایریا میں واقع معروف جیولر محمد علی بھائی کی دکان کو نشانہ بنایا۔ واردات کے دوران دکان کا قیمتی سامان چوری کر لیا گیا، جس سے نہ صرف محمد علی بھائی کو بھاری مالی نقصان اٹھانا پڑا بلکہ دیگر تاجروں میں بھی شدید بے چینی پھیل گئی ہے۔
علاقہ مکینوں اور تاجروں کا کہنا ہے کہ یہ کوئی پہلا واقعہ نہیں، بلکہ حالیہ دنوں میں اس گروہ کی سرگرمیوں میں واضح اضافہ دیکھنے میں آیا ہے۔ مقامی افراد نے پولیس اور متعلقہ حکام سے مطالبہ کیا ہے کہ فوری کارروائی کرتے ہوئے اس خطرناک گروہ کو گرفتار کیا جائے تاکہ علاقے میں دوبارہ امن قائم ہو سکے۔
