ممبئی – بھارتی کامیڈین اور ٹی وی میزبان کپل شرما مشکل میں پڑ گئے ہیں، جب اُن کے نیٹ فلکس شو دی گریٹ انڈین کپل شو میں مقبول کردار ’’بابو راؤ‘‘ پیش کرنے پر اُنہیں 25 کروڑ روپے کا لیگل نوٹس بھیجا گیا۔
بھارتی میڈیا رپورٹس کے مطابق فلم پروڈیوسر فیروز ناڈیاوالا نے یہ نوٹس بھیجا ہے، جس میں کاپی رائٹ اور ٹریڈ مارک کی خلاف ورزی کا الزام عائد کیا گیا ہے۔ ان کا کہنا ہے کہ فلم ہیرا پھیری کے مشہور کردار بابو راؤ گنپت راؤ آپٹے، جو اصل میں سینئر اداکار پریش راول نے ادا کیا تھا، شو میں بغیر اجازت استعمال کیا گیا۔ اس کردار کو شو میں کامیڈین کیکو شرادا نے پیش کیا۔
لیگل نوٹس صرف کپل شرما کو ہی نہیں بلکہ اس شو کے اسٹریمنگ پلیٹ فارم نیٹ فلکس کو بھی بھیجا گیا ہے۔
فیروز ناڈیاوالا، جو ہیرا پھیری فرنچائز اور اس کے کرداروں کے قانونی مالک ہیں، کا کہنا ہے کہ اُن کی اجازت کے بغیر اس کردار کا استعمال دانشورانہ املاک کے حقوق کی خلاف ورزی ہے۔
یاد رہے کہ ہیرا پھیری فلمیں بھارت اور پاکستان میں کلٹ کلاسک سمجھی جاتی ہیں، اور پریش راول کا کردار ’’بابو راؤ‘‘ آج بھی ہر عمر کے مداحوں میں بےحد مقبول ہے۔
