اسلام آباد: ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے انسانی اسمگلنگ کی بڑی کوشش ناکام بنا دی اور پانچ مسافروں کو جہاز سے اتار دیا جو وزٹ ویزوں پر تھائی لینڈ کے راستے ہانگ کانگ جانے کی کوشش کر رہے تھے۔
ایف آئی اے کے ترجمان کے مطابق مسافروں میں بشریٰ، امجد علی، علیزے شاہین، محمد عدنان اور ذیشان علی خان شامل تھے۔ ابتدائی تحقیقات میں انکشاف ہوا کہ صرف امجد علی خاتون مسافر بشریٰ کا حقیقی بیٹا ہے، جبکہ دیگر تین افراد کو جھوٹا بیٹا ظاہر کر کے بیرون ملک بھیجنے کی کوشش کی گئی۔
تحقیقات کے مطابق جعلی بچوں کے اہل خانہ نے ایجنٹ کو فی کس ڈیڑھ کروڑ روپے ادا کیے۔ ایجنٹ نے بھاری رقوم وصول کر کے نادرا ریکارڈ میں رد و بدل کیا اور تینوں کو اعجاز علی کے خاندان میں شامل کر کے ان کا پتہ صوابی درج کر دیا۔ حقیقت میں یہ مسافر سرگودھا، اٹک اور خوشاب کے رہائشی تھے۔
ایف آئی اے نے مزید بتایا کہ اس سکینڈل میں ملوث پاکستان ایئرپورٹ اتھارٹی کے ایک اہلکار کو بھی حراست میں لے لیا گیا ہے۔ تحقیقات کا دائرہ نادرا اور پاسپورٹ دفاتر کے متعلقہ اہلکاروں تک بڑھا دیا گیا ہے تاکہ جعلسازی میں ملوث عناصر کو بے نقاب کیا جا سکے۔
مسافروں کو مزید کارروائی کے لیے اینٹی ہیومن ٹریفکنگ سرکل اسلام آباد کے حوالے کر دیا گیا ہے۔
