پنجابی اداکار و گلوکار دلجیت دوسانجھ نے بھارتی حکومت اور میڈیا کے دوہرے رویے پر کڑی تنقید کرتے ہوئے سوال اٹھایا ہے کہ ان کی فلم سردار جی 3 پر پابندی تو لگائی گئی، لیکن ایشیا کپ 2025 جیسے بڑے کرکٹ ایونٹس بغیر کسی رکاوٹ کے جاری ہیں۔
ملائیشیا میں ایک کنسرٹ کے دوران دلجیت نے کہا:
’’میری فلم فروری میں شوٹ ہوئی تھی جبکہ پہلگام واقعہ اپریل میں پیش آیا۔ فلم کا اس واقعے سے کوئی تعلق نہیں تھا، پھر بھی اسے بین کر دیا گیا۔ دوسری طرف کرکٹ میچز تو اسی دوران کھیلے جا رہے ہیں، یہ دوہرا معیار کیوں؟‘‘
اداکار نے اس موقع پر ناظرین میں موجود ایک بھارتی پرچم دیکھ کر کہا:
’’یہ میرے ملک کا پرچم ہے، اس کے لیے ہمیشہ احترام رہے گا۔‘‘
تاہم انہوں نے بھارتی میڈیا پر الزام لگایا کہ انہیں ’’غدار‘‘ ثابت کرنے کی کوشش کی جا رہی ہے، جبکہ ان کا کہنا تھا کہ ’’پنجابی اور سکھ کبھی اپنے ملک کے خلاف نہیں جا سکتے۔‘‘
یاد رہے کہ پہلگام واقعے کے بعد فلم فیڈریشن آف انڈیا نے نہ صرف سردار جی 3 پر پابندی عائد کرنے بلکہ دلجیت دوسانجھ کے بائیکاٹ کا مطالبہ بھی کیا تھا۔ اگرچہ فلم بھارت میں ریلیز نہ ہو سکی، لیکن عالمی سطح پر اس نے بڑی کامیابی حاصل کی۔
دلجیت کے یہ بیانات ایسے وقت سامنے آئے ہیں جب بھارت اور پاکستان کے درمیان کشیدگی کے باوجود کرکٹ ٹورنامنٹس جاری ہیں۔ ان کا موقف حکومت اور میڈیا کے رویے میں موجود تضادات کو بے نقاب کرتا ہے۔
