پاکستان کے معروف گلوکار و اداکار علی ظفر نے سیلاب زدگان کی مدد کے لیے عملی اقدامات کیے اور الحمرا کلچرل کمپلیکس میں ہونے والے خصوصی امدادی شو میں شرکت کی۔
اس شو کا مقصد متاثرہ افراد کے لیے فنڈز جمع کرنا اور ان کے ساتھ یکجہتی کا اظہار کرنا تھا۔ تقریب میں علی ظفر کے علاوہ نتاشا، علی نور، اور گوہر ممتاز نے بھی پرفارم کیا، جن کی پرفارمنس نے حاضرین کے دل موہ لیے اور ماحول کو جذباتی رنگ دے دیا۔
حاضرین نے بھی اس نیک مقصد کے لیے فنکاروں کے ساتھ یکجہتی کا مظاہرہ کیا اور سیلاب زدگان کی مدد میں حصہ لیا۔
علی ظفر نے خطاب میں کہا:
"سیلاب متاثرین کی مدد ہم سب کی مشترکہ ذمہ داری ہے۔ جو بھی ممکن ہو، ہمیں ضرور کرنا چاہیے۔”
انہوں نے عوام اور ساتھی فنکاروں سے اپیل کی کہ وہ آگے بڑھ کر متاثرہ افراد کے لیے اپنا کردار ادا کریں۔
