تھیٹر، ٹی وی اور فلم کے مشہور و معروف کامیڈین لکی ڈیئر طویل علالت کے بعد 60 برس کی عمر میں لاہور میں انتقال کرگئے۔
خاندانی ذرائع کے مطابق وہ گزشتہ آٹھ ماہ سے پھیپھڑوں اور ذیابیطس کے مرض میں مبتلا تھے۔ اس دوران وہ لاہور کے میو اسپتال میں زیرِ علاج رہے، جہاں ان کی حالت وقت کے ساتھ بگڑتی گئی۔ آخر ایام میں وہ کومہ میں چلے گئے تھے جبکہ گردے، جگر اور معدہ بھی کام چھوڑ چکے تھے۔
اہلِ خانہ نے بتایا کہ مرحوم کی نمازِ جنازہ عصر کے بعد باغبانپورہ میں ادا کی جائے گی، جس میں شوبز شخصیات، عزیز و اقارب اور مداح بڑی تعداد میں شریک ہوں گے۔
لکی ڈیئر گزشتہ چالیس برسوں سے شوبز انڈسٹری کا نمایاں حصہ رہے۔ انہوں نے تھیٹر، ٹی وی ڈراموں اور فلموں میں اپنے منفرد اندازِ مزاح سے ناظرین کو محظوظ کیا۔ ان کی جاندار اداکاری اور برجستہ مکالمے انہیں ہر عمر کے شائقین میں مقبول بنا دیتے تھے۔
فنکار برادری نے ان کے انتقال پر گہرے دکھ اور افسوس کا اظہار کیا ہے۔ ساتھی اداکاروں کا کہنا ہے کہ لکی ڈیئر کا خلا برسوں تک پورا نہیں ہوسکے گا، کیونکہ وہ اسٹیج اور ٹی وی دونوں کے لیے ایک قیمتی سرمایہ تھے۔
