پاکستانی اداکارہ رومیسہ خان نے شوبز انڈسٹری میں اداکاروں کو معاوضے کی تاخیر سے ادائیگی کے مسئلے پر کھل کر بات کی ہے، ان کا کہنا ہے کہ فنکاروں کو اکثر اپنے ہی پیسوں کے لیے بار بار منتیں کرنی پڑتی ہیں۔
ایک حال ہی میں وائرل ہونے والے انٹرویو میں رومیسہ خان نے بتایا کہ انہیں بار بار اپنے پیسوں کا مطالبہ کرنا بہت بُرا لگتا ہے۔ انہوں نے کہا، "ایسا لگتا ہے جیسے میں اپنی محنت کی کمائی کے لیے بھیک مانگ رہی ہوں۔” اداکارہ کے مطابق، وہ کئی بار صرف اس لیے اپنا معاوضہ حاصل نہیں کر سکیں کیونکہ انہیں بار بار مانگنے میں شرم محسوس ہوتی ہے۔
رومیسہ خان نے مزید کہا کہ اگر بروقت ادائیگی نہ ہو تو وہ دوبارہ مطالبہ نہیں کرتیں، جس پر اکثر انہیں ساتھی فنکاروں اور سینئرز کی ناراضی کا سامنا بھی کرنا پڑتا ہے۔
ان کے اس بیان نے ایک بار پھر پاکستان کی شوبز انڈسٹری میں تاخیر سے ادائیگی اور غیر پیشہ ورانہ رویے کے دیرینہ مسئلے کو اجاگر کر دیا ہے، جس پر حالیہ دنوں میں کئی دیگر فنکار بھی آواز اٹھا چکے ہیں۔
