کراچی: معروف ٹیلی ویژن اداکارہ مدیحہ امام نے انکشاف کیا ہے کہ ترکی کے دورے کے دوران انہیں ایک خوفناک تجربے کا سامنا کرنا پڑا، جہاں غلط جگہ سے کرنسی تبدیل کرانے کے باعث وہ انجانے میں جعلی نوٹ استعمال کرنے پر قانونی مشکل میں پھنستے پھنستے بچیں۔
اداکار فیصل قریشی کے پوڈکاسٹ میں گفتگو کرتے ہوئے مدیحہ امام نے بتایا کہ ترکی کے پہلے سفر کے دوران انہوں نے پہنچتے ہی رقم تبدیل کروائی تھی، مگر غالباً وہ غلط جگہ تھی۔ انہوں نے بتایا، "میں نے فروٹ پلیٹر کا آرڈر دیا اور پیسے ادا کیے۔ کچھ دیر بعد دکاندار نے اپنی زبان میں کچھ کہنا شروع کیا جسے میں سمجھ نہیں سکی۔ اس کے بعد وہ سیکیورٹی گارڈ کو لے آیا اور میرے سامنے نوٹ پھاڑ دیا۔”
مدیحہ امام کے مطابق دکاندار کے اس رویے پر وہ شدید حیرت میں پڑ گئیں کیونکہ انہیں ذرا برابر بھی علم نہیں تھا کہ نوٹ نقلی ہے۔ دکاندار نے انہیں بتایا کہ جعلی رقم استعمال کرنے پر پولیس گرفتار بھی کر سکتی ہے، جس پر وہ گھبرا گئیں کہ کیا محض ایک فروٹ پلیٹر کی وجہ سے وہ کسی بڑے عذاب میں پھنسنے والی ہیں۔
خوش قسمتی سے ان کے ساتھ موجود ایک مہربان ترک ڈرائیور نے بروقت معاملے میں مداخلت کی اور دکاندار کو اپنی طرف سے رقم ادا کر کے معاملہ رفع دفع کیا۔ اس واقعے کے بعد مدیحہ امام نے مسافروں کو مشورہ دیا ہے کہ وہ ہمیشہ کسی مجاز ادارے یا سروس کے ذریعے ہی کرنسی تبدیل کروائیں۔
واضح رہے کہ مدیحہ امام نے ڈراموں "مقدار” اور "عشق جلیبی” میں شاندار اداکاری کے جوہر دکھائے ہیں، جبکہ وہ حال ہی میں فیصل قریشی کے ساتھ ڈرامے "بہروپیا” میں نظر آ چکی ہیں۔
