دسمبر کا آخری سپر مون اور نایاب فلکی مظاہرہ شائقینِ فلکیات کی توجہ کا مرکز
آسمان پر دسمبر کا مکمل چاند، جسے “کولڈ مون” کہا جاتا ہے، 2025 کا آخری اور تیسرا سپر مون ہوگا جو جمعرات 4 دسمبر کو اپنے عروج پر پہنچے گا، تاہم ماہرینِ فلکیات کے مطابق اس شاندار منظر کو دیکھنے کا بہترین وقت دراصل بدھ 3 دسمبر کی شام کو ہوگا، جب چاند مشہور ستاروں کے جھرمٹ “پلئیڈیز” کے قریب پہنچے گا۔
ماہرین کے مطابق اس موقع پر تقریباً مکمل چاند پلئیڈیز (Seven Sisters) کے سامنے سے گزرے گا، جسے فلکیات کی زبان میں “اوکلٹیشن” کہا جاتا ہے۔ اس دوران چاند چند لمحوں کے لیے ان ستاروں کو اپنی اوٹ میں لے لے گا، جو ایک نایاب اور دلفریب فلکی منظر ہوگا۔
اسی دوران چاند اپنی بیضوی مدار میں زمین کے سب سے قریب ترین مقام (Perigee) پر بھی ہوگا، جس کی وجہ سے یہ عام چاند کے مقابلے میں زیادہ بڑا اور زیادہ روشن نظر آئے گا، اسی لیے اسے سپر مون کہا جاتا ہے۔ مکمل چاند کا وقت جمعرات 4 دسمبر کو شام 6 بج کر 14 منٹ (ایسٹرن ٹائم) ہوگا۔
مختلف علاقوں میں بہترین وقت
برطانیہ اور یورپ: یہ منظر جمعرات 4 دسمبر کی صبح سورج نکلنے سے پہلے دیکھا جا سکے گا۔ بدھ کی شام سے مشرقی آسمان پر چاند اور پلئیڈیز کو ایک ساتھ طلوع ہوتے دیکھا جا سکتا ہے۔
مشرقی شمالی امریکا: بدھ 3 دسمبر کی شام ابتدائی اوقات میں یہ نایاب منظر دیکھا جا سکے گا۔
مغربی شمالی امریکا: بدھ کی رات اندھیرا چھاتے ہی یہ فلکی مظاہرہ پہلے سے جاری ہو سکتا ہے۔
دسمبر کے مکمل چاند کو “کولڈ مون” کیوں کہا جاتا ہے؟
دسمبر کے مکمل چاند کو کولڈ مون اس لیے کہا جاتا ہے کیونکہ یہ سال کے سب سے زیادہ سرد اور تاریک دنوں میں طلوع ہوتا ہے۔ سال کے تمام 12 مکمل چاندوں کے نام قدیم مقامی امریکی روایات سے ماخوذ ہیں، جو موسم، قدرتی تبدیلیوں اور زرعی سرگرمیوں کی عکاسی کرتے ہیں۔
2025 کے مکمل چاندوں کے نام
2025 میں آنے والے مکمل چاندوں کے نام درج ذیل ہیں:
جنوری — وولف مون
فروری — سنو مون
مارچ — ورم مون
اپریل — پنک مون
جون — اسٹرابیری مون
جولائی — بک مون
ستمبر— کارن مون
اکتوبر — ہنٹر مون
نومبر — بیور مون
دسمبر — کولڈ مون (آخری اور تیسرا سپر مون)
صاف آسمان اور کم روشنی کی آلودگی کے ساتھ دسمبر کا یہ کولڈ مون 2025 کے فلکی سال کا ایک شاندار اور یادگار اختتام ثابت ہوگا۔
