ڈرگ ریگولیٹری اتھارٹی (ڈریپ) نے تین ادویات کے حوالے سے الرٹ جاری کرتے ہوئے فروخت و استعمال پر پابندی عائد کر دی۔
تفصیلات کے مطابق ملک بھر میں جعلی ادویات کے کاروبار کے خلاف بڑی کارروائیاں جاری ہیں، ڈرگ ریگولیٹری اتھارٹی (ڈریپ) نے تین جعلی ادویات کے بیچز کے ریپڈ الرٹس جاری کیے ہیں اور ان کی فروخت و استعمال پر پابندی عائد کر دی ہے۔
ڈریپ نے بتایا کہ سینٹرل ڈرگ لیب کراچی اور ڈی ٹی ایل پنجاب نے کئی ادویات کو جعلی قرار دیا ہے، جن میں تسکین درد گولی (بیچ 091) اور پین نل گولی (بیچ 01) شامل ہیں۔
الرٹ میں کہا گیا کہ لیو ہیلتھ کیئر لیب اور حکیم پرانا دواخانہ کراچی نے یہ ادویات غیر قانونی طور پر تیار اور سپلائی کیں، اور ان کے پاس دواسازی کا کوئی لائسنس موجود نہیں تھا۔
اسی طرح، امراض معدہ کے معروف برانڈ ڈوپھالیک سیرپ کا بیچ 251986 بھی جعلی قرار دیا گیا ہے، جعلی ڈوپھالیک سیرپ کےلیبل پر ملٹی نیشنل ایبٹ فارما کینیڈا کا پتہ درج ہے تاہم ڈوپھالیک سیرپ سازہائی نون فارما نےمتاثرہ بیچ سےاظہارلاتعلقی کیا ہے۔
ڈریپ کے مطابق جعلی ادویات کا استعمال جان لیوا ثابت ہو سکتا ہے، جبکہ علاج کے نتائج متاثر ہونے کا بھی خدشہ ہے۔
ڈریپ نے اپنی ریگولیٹری فورس کو ہدایت کی ہے کہ مارکیٹ میں جعلی ادویات کے سپلائرز کی نشاندہی کریں اور متاثرہ بیچز کو ضبط کیا جائے۔
ساتھ ہی، ڈسٹری بیوٹرز اور میڈیکل اسٹورز کو بھی فوری اطلاع دینے کی ہدایت کی گئی ہے تاکہ عوام کو محفوظ ادویات فراہم کی جا سکیں۔
