19 اگست،2025
اسلام آباد: وفاقی دارالحکومت اسلام آباد، راولپنڈی، پشاور اور قریبی شہروں میں بدھ کی صبح زلزلے کے جھٹکے محسوس کیے گئے، جس سے عوام میں خوف و ہراس پھیل گیا۔
زلزلے کے جھٹکے صبح 10 بج کر 20 منٹ پر ریکارڈ کیے گئے، جبکہ سوات، چترال اور ایبٹ آباد سمیت شمالی علاقوں میں بھی زمین لرز اٹھی۔ لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 5.2 ریکارڈ کی گئی، اس کی گہرائی 190 کلومیٹر جبکہ مرکز ہندوکش ریجن افغانستان تھا۔
تاحال کسی جانی یا مالی نقصان کی اطلاع موصول نہیں ہوئی ہے۔ تاہم، شہریوں کو محتاط رہنے اور غیر ضروری عمارتوں کے اندر زیادہ دیر رکنے سے گریز کی ہدایت دی گئی ہے۔
