اوسلو / لندن — مانچسٹر سٹی کے مایہ ناز فارورڈ ارلنگ ہالینڈ ان دنوں نہ صرف 2026 کے فیفا ورلڈ کپ میں اپنی شاندار کارکردگی بلکہ ہالی ووڈ اداکارہ سڈنی سوینی سے جڑے ایک انتہائی مزاحیہ واقعے کی وجہ سے بھی سوشل میڈیا پر توجہ کا مرکز بنے ہوئے ہیں۔
نارویجن اسٹرائیکر نے مشہور برطانوی یوٹیوبر ‘کے ایس آئی’ (KSI) کی ایک نئی وائرل ویڈیو میں شرکت کی جو 20 جون کو ریلیز کی گئی۔ اس ویڈیو میں دونوں سٹارز مختلف مشہور شخصیات کے ہمشکلوں (Lookalikes) کا جائزہ لے رہے تھے۔ ویڈیو میں اس وقت ایک دلچسپ صورتحال پیدا ہو گئی جب ہالی ووڈ کی ماضی کی لیجنڈری اداکارہ مارلن مونرو کا ایک ہمشکل سفید لباس اور سنہرے بالوں والی وگ پہن کر سامنے آیا، تو ارلنگ ہالینڈ نے انہیں جدید دور کی ہالی ووڈ اسٹار سمجھ لیا۔ ہالینڈ نے کے ایس آئی کے سامنے اعتراف کرتے ہوئے کہا، "ایک لمحے کے لیے مجھے لگا کہ یہ سڈنی سوینی ہیں۔”
ہالینڈ کے اس جملے کے بعد سوشل میڈیا پر میمز کا ایک طوفان آ گیا ہے اور فٹ بال فینز یہ کہہ کر تفریح لے رہے ہیں کہ ورلڈ کپ جیسے بڑے ٹورنامنٹ کے دباؤ میں بھی ہالینڈ کے دماغ پر ہالی ووڈ اداکارہ سوار ہیں۔ اس ویڈیو میں ہیری کین، پیپ گارڈیولا اور جورجین کلوپ کے ہمشکل بھی شامل تھے، جس کی وجہ سے یہ ویڈیو دنیا بھر میں لاکھوں بار دیکھی جا رہی ہے۔
یہ دلچسپ واقعہ ایک ایسے وقت میں سامنے آیا ہے جب ہالینڈ کی قیادت میں ناروے کی ٹیم 1998 کے بعد پہلی بار ورلڈ کپ کھیل رہی ہے۔ ہالینڈ نے عراق کے خلاف شاندار دو گول کر کے اپنی ٹیم کو 4-1 سے فتح دلائی، جس کے بعد سینیگال کے خلاف میچ ڈرا کر کے ناروے نے اگلے راؤنڈ (ناک آؤٹ مرحلے) کے لیے کوالیفائی کر لیا ہے۔ ہالینڈ کی شریکِ حیات ازابیل ہاگسینگ جوہانسن بھی اسٹیڈیم میں موجود رہ کر اپنے شوہر کی حوصلہ افزائی کر رہی ہیں، جن سے دسمبر 2024 میں ان کا ایک بیٹا بھی ہے۔
دوسری جانب ہالینڈ کی اس غلط فہمی نے اداکارہ سڈنی سوینی کی عالمی مقبولیت کو بھی واضح کیا ہے۔ سڈنی سوینی ان دنوں نیٹ فلکس اور پرائم ویڈیو پر ریلیز ہونے والی اپنی تھرلر فلم ‘دی ہاؤس میڈ’ کی ریکارڈ توڑ کامیابی کے بعد دنیا بھر میں اسٹریمنگ چارٹس پر راج کر رہی ہیں۔
