آسٹریلوی کرکٹ ٹیم کے تجربہ کار اوپنر عثمان خواجہ نے کہا ہے کہ ان کی کامیابی اور دوبارہ ٹیم میں واپسی کا اصل راز صرف اور صرف اللہ پر یقین ہے۔ ایک انٹرویو میں گفتگو کرتے ہوئے انہوں نے بتایا کہ ان کے کیریئر میں ایسے کئی مراحل آئے جب وہ ٹیم سے باہر ہو گئے یا فارم میں نہیں تھے، مگر ان تمام مشکلات کے دوران ان کا ایمان اور یقین ہی ان کا سب سے بڑا سہارا رہا۔
عثمان خواجہ نے کہا کہ “میں ہمیشہ اللہ پر یقین رکھتا ہوں، کیونکہ جب آپ دل سے یقین رکھتے ہیں تو وہ آپ کے لیے وہ دروازے کھول دیتا ہے جو انسان خود نہیں دیکھ سکتا۔” انہوں نے کہا کہ جب کبھی انہیں مایوسی یا دباؤ کا سامنا ہوتا ہے، وہ دعا اور یقین کے ذریعے خود کو دوبارہ اُٹھانے کی طاقت پاتے ہیں۔
پاکستانی نژاد کرکٹر نے مزید کہا کہ کرکٹ میں ناکامیاں معمول کا حصہ ہیں، مگر اصل بات یہ ہے کہ آپ اُن سے سیکھ کر کیسے واپس آتے ہیں۔ “میں نے اپنی زندگی میں بارہا یہی دیکھا کہ اگر نیت صاف ہو اور یقین مضبوط، تو کامیابی دیر سے سہی مگر ضرور ملتی ہے۔”
عثمان خواجہ اس وقت آسٹریلوی ٹیم کے سب سے مستقل بلے بازوں میں شمار ہوتے ہیں، اور ان کی فارم اور رویہ نوجوان کھلاڑیوں کے لیے ایک مثال بن چکا ہے۔ اُن کا کہنا تھا کہ ایمان صرف مذہب کا حصہ نہیں بلکہ ایک طرزِ زندگی ہے، جو انسان کو مضبوط بناتا ہے چاہے وہ میدان میں ہو یا باہر
