ذرائع نے انکشاف کیا ہے کہ حکومت پاکستان کے پاس ذخیرہ کروڑوں مالیت کی کورونا ویکیسن ضائع ہونے کا خدشہ ہے۔
ذرائع ایف ڈی آئی کے مطابق وفاق کے پاس کورونا ویکسین کی آخری کھیپ ضائع ہونے کا خدشہ ہے، فیڈرل ڈائریکٹوریٹ آف ایمونائزیشن نے اس سلسلے میں این سی او سی کو خط لکھ دیا ہے۔
ذرائع کا کہنا ہے کہ این سی او سی کو کورونا ویکسین کی صورت حال سے متعلق آگاہ کر دیا گیا ہے، ایف ڈی آئی کے پاس موجود ویکسین آئندہ ماہ ایکسپائر ہو رہی ہے جو کہ وفاقی ڈائریکٹوریٹ کے ویئر ہاؤس میں اسٹور ہے۔
ذرائع کے مطابق ایف ڈی آئی ویئر ہاؤس میں کورونا ویکسین کی 5 ہزار سے زائد ڈوزز موجود ہیں، جو کہ امریکی کمپنی فائزر کی تیار کردہ ویکسین کی کھیپ پر مشتمل ہیں۔
ضائع ہونے کے قریب اس کورونا ویکسین کی مالیت ڈھائی کروڑ سے زائد ہے، این سی او سی نے ویکسین کے بارے میں ایف ڈی آئی کو تاحال جواب نہیں دیا ہے، وہاں سے ہدایات ملنے پر ویکسین کی کھیپ کے بارے میں کوئی فیصلہ کیا جائے گا۔
ادھر ذرائع کا کہنا ہے کہ کورونا ویکسین کے استعمال میں کمی کے باعث صوبوں کو اس کی سپلائی نہیں ہو سکی ہے۔
