09 ستمبر 2025
ویب ڈیسک
اسلام آباد: وفاقی حکومت نے سیلاب متاثرہ علاقوں کے لیے بڑے ریلیف پیکیج کی تیاری مکمل کرلی ہے، جس میں بجلی کے بلوں میں بڑے پیمانے پر ریلیف اور کسانوں کے نقصانات کے ازالے کے اقدامات شامل ہیں۔
ایکسپریس نیوز کے مطابق، حکومت نے سیلاب زدہ علاقوں کے بجلی بلوں سے جنرل سیلز ٹیکس، ایف سی سرچارج اور فکسڈ چارجز ختم کرنے کی تجاویز تیار کرلی ہیں۔ اس کے ساتھ ہی فیول پرائس ایڈجسٹمنٹ پر جنرل سیلز ٹیکس اور ایکسائز ڈیوٹی ختم کرنے کی تجویز بھی دی گئی ہے۔ ذرائع کے مطابق بجلی کے بلوں پر انکم ٹیکس، فاضل ٹیکس اور ریٹیلر سیلز ٹیکس ختم کرنے پر بھی غور جاری ہے۔
وفاقی وزیر رانا تنویر حسین نے اس حوالے سے بتایا کہ سیلاب متاثرہ علاقوں میں تمام ٹیکس فوری طور پر معاف کیے جائیں گے۔ ان کے مطابق، بجلی بلوں میں ریلیف وفاقی حکومت فراہم کرے گی، جب کہ صوبائی حکومتیں لینڈ ریونیو کے ٹیکس معاف کریں گی۔ انہوں نے کہا کہ اضافی بلوں کا بھی نوٹس لیا گیا ہے کیونکہ یہ وہ بل ہیں جو فیصلے سے پہلے پرنٹ ہوچکے تھے۔
رانا تنویر حسین نے مزید کہا کہ حکومت کسانوں کے لیے ایک خصوصی پیکیج بھی لارہی ہے تاکہ فصلوں اور مویشیوں کے نقصان کا ازالہ کیا جاسکے۔ اس پیکیج کا باضابطہ اعلان سیلاب زدہ علاقوں کے سروے کی تکمیل کے بعد کیا جائے گا، جو آئندہ 7 سے 10 دن میں مکمل ہونے کا امکان ہے۔
