ہائر ایجوکیشن کمیشن نے دوہری، ڈبل اور مشترکہ ڈگری پروگرامز سے متعلق تفصیلات جاری کر دی ہیں تاکہ جامعات اور طلبہ کو واضح رہنمائی فراہم کی جا سکے۔
پالیسی فریم ورک کے تحت پاکستانی اعلیٰ تعلیمی ادارے غیر ملکی تعلیمی اداروں کے ساتھ اشتراک سے ڈگری پروگرامز پیش کر سکتے ہیں، تاہم ایسے پروگرامز کے لیے ضابطہ جاتی، تعلیمی اور معیار سے متعلق شرائط پوری کرنا ضروری ہوگا۔ پالیسی کے مطابق کوئی بھی ادارہ باضابطہ منظوری اور این او سی کے بغیر اشتراکی ڈگری پروگرام شروع نہیں کر سکتا۔
اس پالیسی کا مقصد بین الاقوامی تعلیمی تعاون کو فروغ دینا اور طلبہ کو غیر منظور شدہ یا غیر معیاری پروگرامز سے بچانا ہے۔ غیر ملکی اداروں کے لیے بھی ضروری ہوگا کہ وہ اپنے ملک میں باقاعدہ طور پر تسلیم شدہ اور منظور شدہ ہوں۔
طلبہ کو مشورہ دیا گیا ہے کہ داخلہ لینے سے پہلے متعلقہ پروگرام اور ادارے کی منظوری ضرور چیک کریں۔ کمیشن نے عوامی رہنمائی کے لیے منظور شدہ غیر ملکی اشتراک والے تعلیمی اداروں اور پروگرامز کی فہرست بھی جاری کر رکھی ہے۔
اس اقدام سے جامعات کو زیادہ لچکدار تعلیمی راستے فراہم کرنے میں مدد ملے گی، جہاں طلبہ منظور شدہ مقامی اور غیر ملکی تعلیمی شراکت داری کے تحت تعلیم حاصل کر سکیں گے۔
