11 ذوالقعدہ کو امام علی رضا علیہ السلام کی ولادتِ باسعادت عقیدت و احترام کے ساتھ منائی جاتی ہے۔ اس موقع پر دنیا بھر میں اہلِ تشیع اور عاشقانِ اہلِ بیت خصوصی محافل، مجالس اور دعائیہ تقریبات کا انعقاد کرتے ہیں۔ مساجد، امام بارگاہوں اور گھروں کو چراغوں سے سجایا جاتا ہے جبکہ نعت، منقبت اور درود و سلام کی محافل بھی منعقد کی جاتی ہیں۔
امام علی رضا علیہ السلام کی شخصیت علم، تقویٰ، صبر اور انسان دوستی کی علامت سمجھی جاتی ہے۔ آپ کو علم و حکمت کے اعلیٰ مقام کی وجہ سے “عالمِ آلِ محمدؐ” بھی کہا جاتا ہے۔ آپ کی تعلیمات میں رواداری، عدل، اخلاق اور انسانیت کی خدمت پر زور دیا گیا ہے، جس کی وجہ سے دنیا بھر کے مسلمان آپ سے عقیدت رکھتے ہیں۔
ولادتِ باسعادت کے موقع پر پاکستان کے ہر چھوٹے بڑے امام بارگاہوں اور مسجدوں میں نذرو نیاذ کا اہتمام کیا جاتا ہےاور محفلِ میلاد میں علما کرام اپنے خطابات میں امام علی رضا علیہ السلام کی سیرتِ طیبہ اور تعلیمات پر روشنی ڈالتے ہیں تاکہ نئی نسل کو دینی اور اخلاقی اقدار سے روشناس کرایا جا سکے۔
