اسلام آباد: ایران کے وزیر داخلہ اسکندر مومنی نے اپنے سرکاری دورۂ پاکستان کے دوران وزیراعظم شہباز شریف اور چیف آف ڈیفنس فورس (سی ڈی ایف) فیلڈ مارشل سید عاصم منیر سے الگ الگ ملاقاتیں کیں، جن میں دونوں ممالک نے دوطرفہ تعاون کو مزید مضبوط بنانے اور خطے میں امن و استحکام کے فروغ کے عزم کا اعادہ کیا۔
وزیراعظم شہباز شریف سے ملاقات میں پاکستان اور ایران کے دوطرفہ تعلقات، علاقائی سلامتی اور مشرقِ وسطیٰ کی موجودہ صورتحال پر تبادلہ خیال کیا گیا۔ وزیراعظم نے خطے میں کشیدگی کم کرنے کے لیے تحمل، مکالمے اور سفارتی ذرائع اختیار کرنے کی ضرورت پر زور دیتے ہوئے کہا کہ پاکستان خطے میں امن اور استحکام کے لیے اپنی تعمیری کوششیں جاری رکھے گا۔
ایرانی وزیر داخلہ نے راولپنڈی میں جنرل ہیڈکوارٹرز (جی ایچ کیو) کا بھی دورہ کیا، جہاں انہوں نے چیف آف ڈیفنس فورس فیلڈ مارشل سید عاصم منیر سے ملاقات کی۔ ملاقات میں باہمی دلچسپی کے امور، دوطرفہ و علاقائی سلامتی اور پاک ایران سرحد کے مؤثر انتظام پر تفصیلی گفتگو ہوئی۔
پاک فوج کے شعبہ تعلقات عامہ (آئی ایس پی آر) کے مطابق دونوں رہنماؤں نے سرحدی سلامتی، دہشت گردی کے خلاف تعاون اور سیکیورٹی روابط کو مزید مضبوط بنانے پر اتفاق کیا۔
ایرانی وزیر داخلہ نے خطے میں کشیدگی کم کرنے اور امن کے فروغ کے لیے پاکستان کی سفارتی کوششوں کو سراہتے ہوئے کہا کہ دونوں ہمسایہ ممالک کے درمیان تعاون کو مزید وسعت دینا وقت کی اہم ضرورت ہے۔
