8 دسمبر سے کراچی میں سردی میں اضافہ متوقع، شمال مغربی ہوائیں اثر انداز ہوں گی
کراچی: پاکستان محکمہ موسمیات (PMD) نے پیش گوئی کی ہے کہ 8 دسمبر سے کراچی میں موسم مزید سرد ہونے کا امکان ہے، جس کی وجہ شمال مغربی سمت سے چلنے والی ٹھنڈی ہوائیں بنیں گی۔
محکمہ موسمیات کے مطابق اس وقت ایک مغربی موسمی نظام (Western Weather System) شمالی پاکستان اور بلوچستان کے مختلف علاقوں پر اثر انداز ہو رہا ہے، جس کے نتیجے میں پیر سے کراچی کے درجہ حرارت میں 1 سے 2 ڈگری سینٹی گریڈ تک کمی ہو سکتی ہے۔ اگرچہ شہر میں کسی شدید سرد لہر کے امکانات موجود نہیں، تاہم رات اور صبح کے اوقات میں ٹھنڈ کی شدت میں اضافہ متوقع ہے۔
کراچی کے چیف میٹرولوجسٹ نے بتایا کہ مغربی موسمی نظام کے باعث بلوچستان میں پیدا ہونے والی سرد ہوائیں جزوی طور پر کراچی تک پہنچ رہی ہیں، جس کے باعث بلوچستان کی سمت سے چلنے والی شمال مشرقی ہوائیں کراچی کے موسم کو مزید سرد محسوس کروائیں گی۔
محکمہ موسمیات کا کہنا ہے کہ دسمبر کے وسط سے پہلے کراچی میں شدید سردی کی لہر کا کوئی امکان نہیں۔ آئندہ چند دنوں میں شہر کا کم سے کم درجہ حرارت 12 سے 14 ڈگری سینٹی گریڈ کے درمیان رہنے جبکہ زیادہ سے زیادہ درجہ حرارت 27 سے 29 ڈگری سینٹی گریڈ تک رہنے کی توقع ہے۔ اس کے علاوہ، محکمہ موسمیات نے واضح کیا ہے کہ اس وقت کراچی میں بارش کی کوئی پیش گوئی نہیں کی جا رہی، حالانکہ ملک کے دیگر حصوں میں مغربی سسٹم داخل ہو چکا ہے۔
واضح رہے کہ رواں ہفتے کے دوران کراچی میں پہلے ہی شدید ٹھنڈی ہواؤں کے باعث سردی میں نمایاں اضافہ دیکھا گیا۔ بدھ کے روز شہر کا کم سے کم درجہ حرارت جناح ٹرمینل پر 8.9 ڈگری سینٹی گریڈ ریکارڈ کیا گیا جو شہر کا سب سے کم درجہ حرارت تھا۔ اس کے علاوہ بن قاسم میں 12.1، اولڈ ایئرپورٹ پر 12.5 جبکہ شاہراہ فیصل اور مری پور میں 13.5 ڈگری سینٹی گریڈ تک درجہ حرارت رپورٹ ہوا۔
محکمہ موسمیات کے مطابق اس روز بلوچستان کی شمال مشرقی سمت سے چلنے والی ہواؤں کی رفتار 25 کلومیٹر فی گھنٹہ تک ریکارڈ کی گئی، جس کے باعث سردی میں نمایاں اضافہ ہوا۔ اسی دن شہر میں زیادہ سے زیادہ درجہ حرارت 28.4 ڈگری سینٹی گریڈ رہا، جس سے دن اور رات کے درجہ حرارت میں واضح فرق دیکھا گیا۔
محکمہ موسمیات نے شہریوں، خصوصاً بچوں اور بزرگ افراد کو مشورہ دیا ہے کہ وہ سرد موسم کے پیش نظر احتیاطی تدابیر اختیار کریں کیونکہ آئندہ دنوں میں سردی کا اثر بتدریج بڑھنے کا امکان ہے۔
