فروری 4، 2026
ویب ڈیسک
پاکستان نے سعودی عرب سے مؤخر ادائیگیوں پر تیل حاصل کرنے کی سہولت کی مدت ایک سال سے بڑھا کر دو سال کرنے کی درخواست کر دی ہے۔ اس اقدام کا مقصد بیرونی ادائیگیوں کے دباؤ میں کمی لانا ہے۔
ذرائع کے مطابق حکومت کی معاشی ٹیم اور سعودی حکام کے درمیان اس حوالے سے مذاکرات جاری ہیں۔ حکام کو امید ہے کہ معاہدے میں توسیع سے زرمبادلہ کے ذخائر پر پڑنے والا دباؤ کم ہوگا۔
موجودہ معاہدہ مارچ 2026 میں ختم ہو رہا ہے جبکہ مؤخر ادائیگیوں پر تیل کی سہولت کے تحت 1.2 ارب ڈالر کی مدت رواں ماہ مکمل ہو جائے گی۔ مارچ 2026 سے پاکستان قرض کی واپسی شروع کرنے کا پابند ہوگا۔
ذرائع کے مطابق اگر معاہدے کی مدت ایک سال سے بڑھا کر دو سال کر دی گئی تو پاکستان کیلئے ادائیگیوں میں آسانی پیدا ہوگی۔ نئے معاہدے کی صورت میں یہ سہولت فروری 2027 تک جاری رہ سکتی ہے۔
