اسلام آباد: ملک میں مہنگائی کی ہفتہ وار شرح میں نمایاں کمی ریکارڈ کی گئی ہے۔ ادارہ شماریات کے مطابق گزشتہ ہفتے مہنگائی کی مجموعی شرح میں 0.64 فیصد کمی ہوئی، جس کے بعد سالانہ افراطِ زر 4 فیصد کی سطح پر آ گئی ہے۔
اعداد و شمار کے مطابق رواں ہفتے 13 اشیائے ضروریہ کی قیمتوں میں اضافہ، 15 کی قیمتوں میں کمی جبکہ 23 کی قیمتیں مستحکم رہیں۔
مہنگی ہونے والی اشیاء میں لہسن 1.86 فیصد، کوکنگ آئل 1.54 فیصد، انڈے 0.81 فیصد اور گھی 0.40 فیصد شامل ہیں۔ اسی طرح کیلے، آٹا، ایل پی جی اور سگریٹس کی قیمتوں میں بھی اضافہ ریکارڈ ہوا۔
دوسری جانب سبزیوں اور بنیادی غذائی اشیاء میں خاطر خواہ کمی دیکھنے میں آئی۔ رپورٹ کے مطابق ٹماٹر 30.11 فیصد، پیاز 12.41 فیصد اور آلو 6.92 فیصد سستے ہوئے۔ چکن 4.46 فیصد اور چینی کی قیمت میں بھی 3.31 فیصد کمی ہوئی۔
مزید برآں دال چنا، دال مسور، ڈیزل اور پیٹرول کی قیمتوں میں بھی کمی نوٹ کی گئی، جس سے عوامی سطح پر مہنگائی کے دباؤ میں کچھ نرمی محسوس کی جا رہی ہے
