پشاور کو جدید بنانے اور اس کی تاریخی شناخت کو دوبارہ اجاگر کرنے کے لیے حکومت نے 100 ارب روپے کے بڑے ترقیاتی پیکج کا اعلان کر دیا ہے۔ اس منصوبے کو صوبے کی تاریخ کا سب سے بڑا شہری ڈویلپمنٹ پروگرام قرار دیا جا رہا ہے۔
وزیراعلیٰ کی زیرِ صدارت پشاور کے موجودہ اور سابق اراکینِ اسمبلی کے ساتھ ایک اہم اجلاس میں شہر کی انفراسٹرکچر ری اسٹرکچرنگ، جدید ٹرانسپورٹ سسٹم، شہری منصوبہ بندی اور عوامی سہولیات میں بہتری کے لیے جامع حکمتِ عملی پیش کی گئی۔
اس منصوبے کے تحت سڑکوں کی توسیع، نکاسی آب اور سیوریج نظام کی اپ گریڈیشن، پبلک ٹرانسپورٹ میں بہتری، اور شہر کے اہم علاقوں کی ازسرِنو تعمیر شامل ہے۔ حکام کے مطابق پشاور چونکہ صوبے کا چہرہ ہے، اس لیے اس کی ترقی میں مزید تاخیر ممکن نہیں۔
اس ترقیاتی وژن کو عوام کے سامنے پیش کرنے کے لیے 7 دسمبر کو بڑا عوامی اجتماع بھی منعقد کیا جائے گا۔ سیاسی قیادت اور ضلعی انتظامیہ نے اعتماد کا اظہار کیا ہے کہ 100 ارب روپے کا یہ منصوبہ پشاور کو جدید، صاف اور موثر شہری مرکز میں تبدیل کر دے گا
