پاکستان میں پولیو کے خلاف مہم نے بڑی کامیابی حاصل کر لی ہے۔ نیشنل ایمرجنسی آپریشن سینٹر (ای او سی) کے مطابق 2024 میں پولیو کے 74 کیسز رپورٹ ہوئے تھے جو 2025 میں کم ہو کر صرف 30 رہ گئے ہیں۔
نیشنل ای او سی کا کہنا ہے کہ ستمبر 2025 کے بعد ملک بھر میں پولیو کا کوئی نیا کیس رپورٹ نہیں ہوا، جبکہ بلوچستان اور پنجاب میں تقریباً ایک سال سے پولیو کا کوئی نیا کیس سامنے نہیں آیا۔
بیان کے مطابق 2025 کے دوران انسدادِ پولیو کی چھ اعلیٰ معیار کی قومی مہمات کامیابی سے منعقد کی گئیں، جن کے دوران حالیہ قومی پولیو مہم میں ملک بھر میں 98 فیصد سے زائد بچوں کو پولیو ویکسین فراہم کی گئی۔
نیشنل ای او سی کے مطابق گزشتہ مہم کے مقابلے میں ویکسین سے محروم بچوں کی تعداد میں 18 فیصد کمی ریکارڈ کی گئی ہے، جو پولیو کے خاتمے کی جانب ایک اہم پیش رفت ہے۔
ای او سی کا کہنا ہے کہ پولیو کے خاتمے میں مضبوط حکومتی قیادت، متعلقہ اداروں کے درمیان مؤثر تعاون، فرنٹ لائن ہیلتھ ورکرز اور سیکیورٹی اداروں کی مشترکہ کوششوں نے کلیدی کردار ادا کیا ہے۔
مزید بتایا گیا کہ کمیونٹی، مذہبی رہنماؤں اور میڈیا کی شمولیت سے پولیو پروگرام پر عوامی اعتماد میں اضافہ ہوا ہے۔ نیشنل ای او سی کے مطابق پاکستان 2026 میں پولیو کے مکمل خاتمے کے لیے فیصلہ کن اقدامات کو مزید مؤثر بنا رہا ہے۔
