اسلام آباد: وزیراعلیٰ پنجاب مریم نواز کی تقریر پر اعتراض کرتے ہوئے پاکستان پیپلز پارٹی (پی پی پی) نے قومی اسمبلی کے اجلاس سے واک آؤٹ کر دیا۔
اسپیکر ایاز صادق کی زیر صدارت اجلاس میں پیپلز پارٹی کے رہنما نوید قمر نے کہا کہ “ہمیں وزارتیں یا عہدے نہیں چاہئیں، کم از کم عزت تو دی جا سکتی ہے۔ ایسے رویے رہے تو ہمیں اپوزیشن بینچز پر جانا پڑے گا۔”
’ہمارا پانی؟ ہمیں عزت دیں‘
نوید قمر نے کہا کہ ملک سیلاب کی سنگین صورتحال سے گزر رہا ہے، لوگ قیادت کی طرف دیکھ رہے ہیں۔ “وزیراعلیٰ پنجاب کی تقریر پر دکھ ہوا۔ یہ کہنا کہ ’ہمارا پانی‘ کیا مطلب رکھتا ہے؟ ہمیں عزت دیں اور عوام کے بارے میں سوچیں۔”
ان کے بیان پر ایوان میں تحریک انصاف اور اپوزیشن اراکین نے ڈیسک بجائے اور انہیں اپوزیشن بینچز پر آنے کی دعوت دی۔
اعظم نذیر تارڑ کی معذرت
وفاقی وزیر قانون اعظم نذیر تارڑ نے پیپلز پارٹی کے تحفظات پر کہا کہ “یہ ہمارا آپس کا معاملہ ہے، اپوزیشن خوش نہ ہو۔” انہوں نے مزید کہا کہ اگر کسی کی دل آزاری ہوئی ہے تو وہ معذرت خواہ ہیں۔
پس منظر
یاد رہے کہ پنجاب میں حالیہ سیلاب کے بعد پیپلز پارٹی نے وزیراعظم سے متاثرین کی مدد کے لیے عالمی امداد کی اپیل کرنے اور بی آئی ایس پی کے ذریعے ریلیف فراہم کرنے کا مطالبہ کیا تھا۔
تاہم فیصل آباد میں ایک تقریب سے خطاب میں مریم نواز نے پی پی قیادت پر تنقید کرتے ہوئے کہا تھا کہ “عوام کی خدمت کے لیے کسی کی اجازت درکار نہیں۔ ہر مسئلے کا حل صرف بی آئی ایس پی نہیں ہے، اور بھیک مانگنے کا سلسلہ ختم ہونا چاہیے۔”
وزیراعلیٰ پنجاب نے مزید کہا تھا کہ “پنجاب اگر اپنے حصے کی نہریں نکالنا چاہے تو دوسروں کو کیا تکلیف ہے؟ پنجاب کے عوام کو حق دلانے کے لیے کسی سے اجازت لینے کی ضرورت نہیں۔”
ایوان میں شور شرابے کے دوران اسپیکر نے اجلاس 3 اکتوبر تک ملتوی کر دیا۔
