وزیراعظم کی فوکل پرسن برائے انسدادِ پولیو عائشہ رضا فاروق نے سال 2026 کی پہلی قومی انسدادِ پولیو مہم کے حوالے سے خصوصی پیغام جاری کرتے ہوئے کہا ہے کہ یہ مہم 2 سے 8 فروری تک جاری رہے گی۔
انہوں نے بتایا کہ اس قومی مہم کے دوران ملک بھر میں 4 کروڑ 50 لاکھ سے زائد بچوں کو پولیو سے محفوظ بنانے کا ہدف مقرر کیا گیا ہے، جس کے لیے 4 لاکھ سے زائد پولیو ورکرز گھر گھر جا کر پانچ سال سے کم عمر بچوں کو پولیو کے قطرے پلائیں گے۔
عائشہ رضا فاروق نے والدین اور کمیونٹی سے اپیل کی کہ وہ پولیو ورکرز کے ساتھ بھرپور تعاون کو یقینی بنائیں اور ہر مہم کے دوران اپنے بچوں کو پولیو کے قطرے ضرور پلوائیں۔
انہوں نے کہا کہ وفاقی اور صوبائی ادارے پولیو کے خاتمے کے لیے مکمل یکجہتی کے ساتھ کام کر رہے ہیں اور حکومتِ پاکستان پولیو کے مکمل خاتمے کے لیے پُرعزم ہے۔
فوکل پرسن نے اس بات پر زور دیا کہ پولیو کے خاتمے کے لیے عوامی تعاون کلیدی حیثیت رکھتا ہے، جبکہ علمائے کرام اور میڈیا کو بھی پولیو سے متعلق آگاہی کے فروغ میں مؤثر کردار ادا کرنا ہوگا۔
آخر میں انہوں نے کہا کہ آئیے ہم سب مل کر پولیو کو شکست دیں اور ایک صحت مند پاکستان کو یقینی بنائیں۔
