حکومت پنجاب نے لاہور میں مزید دو ٹیچنگ ہسپتال قائم کرنے کا فیصلہ کر لیا ہے۔
دونوں ہسپتال مجوزہ نواز شریف میڈیکل ڈسٹرکٹ میں تعمیر کیے جائیں گے، جس کے لیے شہر میں مجموعی طور پر 191 ایکڑ اراضی مختص کی گئی ہے۔
حکام کے مطابق خیابانِ امین انٹرچینج رنگ روڈ کے ساتھ اراضی مختص کر دی گئی ہے۔ منصوبے کے تحت 99 کنال زمین پر چلڈرن ہسپتال ٹو کی نئی عمارت تعمیر کی جائے گی جس کی لاگت کا تخمینہ 23 ارب 68 کروڑ روپے لگایا گیا ہے۔
اسی میڈیکل ڈسٹرکٹ میں 18 کنال پر انفیکشن ڈیزیزز ہسپتال قائم کیا جائے گا، جبکہ مجموعی منصوبے پر تقریباً 34 ارب روپے لاگت آئے گی۔ مزید برآں 180 کنال اراضی پر سنٹر فار ایکسیلنس فار نرسنگ ایجوکیشن اینڈ مڈوائفری قائم کیا جائے گا جس کی تعمیر پر 13 ارب روپے خرچ ہوں گے۔
انفراسٹرکچر ڈویلپمنٹ اتھارٹی پنجاب نے منصوبے کے لیے باقاعدہ ٹینڈرز جاری کر دیے ہیں۔ حکام کا کہنا ہے کہ ان منصوبوں کی تکمیل سے نہ صرف جدید طبی سہولیات میں اضافہ ہوگا بلکہ میڈیکل ایجوکیشن اور نرسنگ ٹریننگ کے شعبے کو بھی فروغ ملے گا۔
