بنگلا دیش میں نرسنگدی کے قریب زلزلے کے شدید جھٹکے، تین ہلاکتیں
دارالحکومت ڈھاکہ اور بھارت کے مشرقی علاقوں میں بھی جھٹکے محسوس کیے گئے
بنگلا دیش کے نرسنگدی شہر کے قریب آج ایک شدید زلزلے کے جھٹکے محسوس کیے گئے، جس کی شدت 5.7 ریکارڈ کی گئی۔ جرمن ریسرچ سینٹر برائے جیوسائنسز (GFZ) کے مطابق زلزلے کا مرکز زمین کی سطح سے تقریباً 10 کلومیٹر گہرائی میں تھا۔
امریکی جیولوجیکل سروے کے مطابق نرسنگدی، دارالحکومت ڈھاکہ سے تقریباً 40 کلومیٹر مشرق میں واقع ہے۔ رائٹرز کے مطابق زلزلے کے جھٹکے دارالحکومت ڈھاکہ اور ملک کے مشرقی حصوں تک محسوس کیے گئے۔ بھارت کے مشرقی سرحدی علاقوں میں بھی لوگ جھٹکے محسوس کر کے خوفزدہ ہوئے، تاہم اب تک وہاں کسی بڑے نقصان یا جانی نقصان کی اطلاع نہیں۔
پولیس نے تصدیق کی ہے کہ اس زلزلے کے نتیجے میں تین افراد ہلاک اور متعدد زخمی ہوئے۔ ہلاکتیں اس وقت ہوئیں جب ایک چھ منزلہ عمارت کی ریلنگ گر گئی۔ کئی عمارتیں متاثر ہوئیں اور کچھ عارضی ڈھانچے زمین بوس ہو گئے۔
رہائشیوں نے بتایا کہ جھٹکوں کے بعد لوگ گھروں سے باہر نکل آئے، اور بچوں اور بزرگوں کو محفوظ مقامات پر لے جایا گیا۔ ڈھاکہ کے ایک رہائشی صدمان سکیب نے بتایا، ”میں نے اپنی زندگی میں اتنے شدید جھٹکے کبھی محسوس نہیں کیے۔ دفتر میں فرنیچر ہلنے لگا تو ہم فوراً نیچے نکل آئے اور سڑک پر دیکھا کہ سب لوگ باہر نکلے ہوئے تھے۔“
