خیبر پختونخوا حکومت نے صوبے کے سمر زونز میں سرکاری اور نجی اسکولوں کے لیے سمر کیمپس شروع کر دیے ہیں، جن کا مقصد چار روزہ تعلیمی ہفتے کے باعث ہونے والے تعلیمی نقصان کو پورا کرنا ہے۔ کیمپس یکم جون سے 30 جون 2026 تک جاری رہیں گے۔
محکمہ ابتدائی و ثانوی تعلیم کے مطابق تیسری سے آٹھویں جماعت کے طلبہ صبح 7 بجے سے 9 بجے تک کلاسز لیں گے، جہاں انگریزی، اردو، ریاضی، جنرل سائنس اور جنرل نالج جیسے بنیادی مضامین پر خصوصی توجہ دی جائے گی۔ کنڈرگارٹن، پہلی اور دوسری جماعت کے طلبہ کو اس پروگرام سے مستثنیٰ رکھا گیا ہے۔
تعلیمی حکام کے مطابق یہ فیصلہ پیٹرولیم بحران کے دوران اسکولوں میں چار روزہ ہفتہ نافذ ہونے کے بعد ضائع ہونے والے تدریسی وقت کی تلافی کے لیے کیا گیا ہے۔ سمر کیمپس میں بنیادی خواندگی، اعداد شناسی، ریمیڈیل لرننگ، سرگرمیوں پر مبنی تدریس اور پراجیکٹ بیسڈ لرننگ پر زور دیا جائے گا۔
محکمہ تعلیم نے اسکولوں کو ہدایت کی ہے کہ کیمپ کے اوقات صرف تعلیمی سرگرمیوں کے لیے استعمال کیے جائیں، جبکہ اسمبلی، کھیلوں، بزمِ ادب، مہمان اسپیکر سیشنز اور دیگر غیر نصابی سرگرمیوں سے گریز کیا جائے۔ سمر کیمپ کے اوقات کسی صورت صبح 10 بجے سے آگے نہیں بڑھائے جائیں گے۔
حکام کے مطابق کیمپس کے اختتام پر طلبہ کی کارکردگی کا جائزہ بھی لیا جائے گا، جبکہ بہترین کارکردگی دکھانے والے طلبہ اور اساتذہ کو ضلعی سطح پر انعامات اور سرٹیفکیٹس دیے جائیں گے۔
