راولپنڈی: راولپنڈی کی مقامی عدالت نے ٹیکسلا میں ٹک ٹاکر شمسو عائشہ گیلمنہ کے قتل کے مقدمے میں پانچ ملزمان کے جسمانی اور عدالتی ریمانڈ منظور کرلیے۔
عدالت نے فائرنگ میں مبینہ طور پر ملوث دو شوٹرز یاسین اور احسان اللہ کا چار روزہ جسمانی ریمانڈ منظور کیا ہے۔
اس کے علاوہ مجسٹریٹ نے مقتولہ کے والد فضل، بھائی بشیر اور چچا روزی خان کو 14 روزہ عدالتی ریمانڈ پر بھیجنے کا حکم دیا۔
ریمانڈ کے احکامات کے بعد تمام ملزمان کو اڈیالہ جیل منتقل کردیا گیا۔
اس سے قبل تمام ملزمان کو ایریا مجسٹریٹ محمد آصف اقبال کے سامنے پیش کیا گیا۔
پولیس کے مطابق ٹک ٹاکر شمسو عائشہ گیلمنہ کو 14 اگست کو مبینہ طور پر منصوبہ بندی کے بعد فائرنگ کرکے قتل کیا گیا تھا۔
پولیس نے تحقیقات کے دوران مقتولہ کے والد، بھائی، چچا اور دونوں مبینہ شوٹرز کو گرفتار کیا تھا۔
