لاہور – ریلویز پولیس نے کارروائی کرتے ہوئے خود کو آرمی کا بریگیڈیئر ظاہر کرنے والے شخص کو گرفتار کرلیا۔ ترجمان ریلویز پولیس کے مطابق ملزم بہادر علی سرکاری دفاتر کو فون کرکے آرمی آفیسر بن کر فراڈ اور بلیک میلنگ کرتا تھا۔
ترجمان نے بتایا کہ فروری میں ملزم نے ایس پی ورکشاپس کے دفتر فون کرکے خود کو حاضر سروس بریگیڈیئر ظاہر کیا اور مغلپورہ کے صوفی شوکت قادری سے رابطہ کروانے کی درخواست کی۔ رابطہ ہونے پر ملزم نے صوفی شوکت پر دہشت گردی میں ملوث ہونے کا جھوٹا الزام لگا کر ایک لاکھ روپے بھتہ طلب کیا۔
ملزم نے مزید دعویٰ کیا کہ مدرسے کے وضوخانے کے قریب دہشت گردی سے متعلق موبائل سمز موجود ہیں۔ تفتیش میں انکشاف ہوا کہ یہ سب جعلی کہانی تھی اور ملزم نے فرضی نام سے مدرسہ انتظامیہ کو بلیک میل کیا۔
ریلویز پولیس نے فروری میں ٹیلیگراف ایکٹ کے تحت مقدمہ درج کرکے تفتیش شروع کی۔ ایس پی کی ہدایت پر انسپکٹر راشد شاہ زمان اور ایس ایچ او لیاقت علی پر مشتمل ٹیم نے جدید ٹیکنالوجی کی مدد سے جعلی بریگیڈیئر بہادر علی کو گرفتار کرلیا۔ مزید تفتیش جاری ہے۔
